其實依家已經九月，我諗我應該唔洗介紹ProMini Q3/Q5/Q5PD呢幾件產品到底有幾巴閉，因為其實網上已經大把人講過。我只係想講佢到底點樣幫MacBook充電。

因為懶得慢慢講佢地嘅spec，所以我擺呢兩張圖出黎，識睇就會立即明 😀

我今日會用Q5PD黎做講解例子。其實三款入面有好多野都係共通，只係Q5PD有一個USB-C插頭係特別支援PD咁解。

其實三件產品我都玩過，點解獨愛PD？依家幫手機平板電腦叉電，最常講不外乎都係幾個字：快叉、QC2.0/3.0，最近又有PD，或者會聽到大家一頭煙。我唔知好彩定唔好彩，全屋目前所有支援快叉嘅制式都係PD（USB Power Delivery）而唔係QC（Qualcomm Quick Charge），Switch又係咁，我部Nexus 5X又係咁，偏偏一件支援QC嘅產品都無。然後MacBook Pro with Touch Bar、MacBook 12″都係支援PD而非QC，所以買PD版本真係毫無懸念。

如何幫MacBook充電？

首先第一點，雖然講黎有少少多餘：要幫MacBook Pro with Touch Bar同埋MacBook 12″充電，三個產品當中只有Q5PD支援。買Q5PD跟機有一條1米長USB-C線，用佢黎叉電腦真心快，叉Switch叉手機都相當可靠。

如果你部MacBook係用MagSafe/MagSafe 2又如何？呢個就係成篇文嘅重點。提提大家，買充電器記得要買「筆電版」，因為接下來講嘅重點將會集中響「筆電版」嗰抽線上面 😀

（響呢度容許我岔開少少話題 – 成個發掘測試過程，我買左勁多線材同測試工具，不過依家唔會show off俾大家睇晒，因為當中有唔少係買黎用唔到…）

接下來有兩個問題。

即使Q5PD本身電力規格非常強勁，但其實如果你不能夠誘發佢嘅力量（例如充電對象支援QC），嗰幾個USB插頭就只會係普通輸出，就算快極都只係5V底下谷盡，絕對唔夠力叉MacBook；再者，睇勻堆連接線，無一個係MagSafe/MagSafe 2款式，咁點算？

當初我以為，買到一條USB->DC插頭，再配一條DC插頭->MagSafe，就可以做到MacBook充電，點知原來唔得，正當我一頭煙之際，突然發覺，「筆電版」連接線入面，其中有一個正正就係合用之極嘅DC 5.5×2.5mm款式！於是我將USB->DC線，替換成「筆電版」連接線+DC插頭，成件事即刻通左～～

另外一種玩法，就係唔用DC->MagSafe2 adapter，轉用長線，（但因為兩個公頭，所以要再買乸乸轉插）即係咁樣：

詳情唔講太深入喇，總之即使你買左MagSafe轉插，但唔係用ProMini條線，你係做唔到MacBook充電架～我同同事一齊度過條線，極度懷疑條線入面係有某啲特殊晶片…

如果你已經買左普通版、又或者你想買嘅Q5PD本身無跟notebook線，你可以去番舖頭，問下佢地有冇得散賣、又或者去番官網直接購買。兩套都得，如果你唔洗叉相關電腦的話，揀套平啲就算喇。