last updated: 2016-05-27

ICBC card

2016年5月22日，天晴。支付寶實名認證新制生效第三日。

今日我成功搞左支付寶實名認證，我響呢度分享我既成功經歷，各位有興趣既朋友可以照跟。

突然決定北上

因為工作需要，所以不時會用到淘寶，用支付寶黎俾錢找數就當然走唔甩啦～響香港，買淘寶野經支付寶找數其實幾多選擇，你可以用支付寶購物卡，可以用八達通，可以用PPS，又可以用信用卡，依家仲有上海商業銀行支援快捷支付功能添。

其實一個正常淘寶用家，係唔需要做支付寶實名認證架。

不過，如果你係想做轉帳，或者買虛擬產品、經淘寶以外地方買野的話，你就會發現，剛剛生效既支付寶實名認證係有幾重要：無左佢就唔可以入credit落去，亦唔可以收人地既錢，即係話，以前搵支付寶代充公司黎入credit買野既方法，已經變相失效。

做代付既公司都唔係蠢既，大不了就改做代付，係咪？所以即使我工作上需要過數俾人，我都無諗過一定要為左搞實名認證而番大陸開銀行卡，點知…

我放上去淘寶二手既死貨，偏偏響呢個時候有人買！ Orz

因為系統指定要我去收錢，而呢件事係無得搵人代收既，所以如果我唔想筆錢無啦啦無左，一係唔做生意，一係就死死地氣去開個銀行卡，好明顯，我係揀左後者。

[hr]

事前小準備

  • 一張有data、可以收大陸電話同SMS既SIM Card（唔好買錯純數據卡），最好香港都收到大陸SMS既
  • 智能電話一部
  • 回鄉證（港澳居民來往內地通行證）
  • 香港身分證
  • 至少四百蚊人民幣
  • 唔需要帶住址證明
  • 有需要可以帶埋電腦，上網做實名認證時用，但非必需

    有人問我邊張sim card好，我當時就揀左大陸聯通既4G太空卡，鴨記賣緊60~70港紙，內有50蚊人仔面額，包裝上面寫既內容比較難明，大約意思係十五蚊月費入面有廣東省內900M+全國100M+非繁忙時段3000M數據流量，打電話額外收費，而收SMS同國內聽電話都免費 – 買時一定要試過打得出電話先好俾錢，ok？[hr]

開銀行卡流程精讀

我地目標為本、以工商銀行羅湖一家分行做例子：

深圳國貿支行
地址: 深圳市羅湖區國貿大廈B區一樓
電話: 0755-82211004
營業時間: 星期一至五 09:00~17:00 / 星期六日 09:00~16:00

 

其實羅湖站行過去好快架咋。

今次星期日下午時段，銀行無乜客人，我地一入到去就見到機器多過人，原來大陸工商銀行出銀行卡已經自動化到有部機器處理 😮

 

我地見到部機真係wow一聲

似乎呢間工商銀行非常熟悉香港人開戶既需要，同我地溝通既兩位職員都講廣東話之餘，成個申請操作流程都有佢地一路指導同操作，影相、簽名，存款，再搞網上銀行密碼修改、成件事都十幾分鐘內完成，算係非常之快。

申請工商銀行卡需要出示香港身分證、回鄉證正本，提供香港地址（無需證明），大陸手機號碼（申請期間或須接收SMS），存入最少四百蚊人民幣。

四百蚊入面，當中有三百蚊係開戶需要長期存放既（一個月內每日平均不足三百蚊的話，每月扣一蚊），然後有十蚊「工本費」、五蚊「開換卡費」、同埋十蚊「卡年費」。如果你當呢四百蚊係既定支出的話，其實應該都可以玩到至少八年既…

[hr]

教你如何免年費、免最低存款額

呢個方法係響我出文之後讀者回報既堅料，已經確認有效！來源在此，呢個時候大概應該要感謝國家感謝黨（不過成單野都係佢地搞出黎，唉）

方法好簡單：申請時同銀行職員講「想申請免費戶口」，咁你開戶就只需要存入最低存款額、首次登記費同埋保安編碼器/手指既費用（例如工商銀行，你要存款三百蚊人仔+十五蚊charge），咁你從此無需交十蚊年費，更加可以無視最低每日戶口要有三百蚊既規定，就算戶口無錢都唔會收charge！！！

如果你已經開左戶口，咁又點呢？銀行收左既charge就無得退番架喇，不過你可以隨時親身番銀行度辦理改為免費戶口既手續，銀行表示無需出示證件，只需出示銀行卡就可以處理（有報道指可以代辦，但工商銀行職員答要親身辦理）。
[hr]

實名認證須知

首先，非常緊要！搞完銀行卡之後唔好拿拿聲衝番香港，因為搞實名認證有可能要收大陸SMS架！

雖然e-zone篇文同你講可以就咁入資料搞認證，但我今日做既流程完全唔一樣…可能因為我以前已經係認證用戶，依家只係補資料既關係啦，我今次要用番頭先開銀行卡完全一樣既電話號碼，去bundle張銀行卡落支付寶。

如果你想用手機做實名認證的話，唔好用支付寶app黎做，直接用web browser打開 http://alipay.com ，無視佢叫你開app既訊息，直接切換為桌面版支付寶網站。如果嫌手機操作麻煩，你可以用電腦上住網黎做。

睇番呢篇支付寶help入面，香港用戶需要準備綁定大陸銀行卡同埋回鄉證。

根據另一篇支付寶help入面所講，支援港澳台、外籍認證既银行有以下呢幾間：

「興業銀行、民生銀行、浦發銀行、工商銀行、招商銀行、交通銀行、中國銀行、廣發銀行、中信銀行、光大銀行、杭州銀行、郵儲銀行、平安銀行，支持認證的銀行卡要求為在大陸地區辦理的銀行卡。同時銀行卡需為儲蓄卡（存折不支持認證），銀行卡的開戶名需要與認證填寫的信息一致。」
2015-05-25 update:
網頁改成以下呢句：「支持認證的銀行卡要求為在大陸地區辦理的銀行卡，具體支持的銀行請您以頁面為準。」
其實事先我問過平時幫我做開代充值既公司，佢答我中信銀行ok，咁我就集中搵中信銀行既資料啦。呢一段申請過程唔提喇，因為後尾發現中信銀行張卡同實名認證唔夾，我地決定即刻撳番錢出黎，去工商銀行開戶 XD
（後尾我試過中信銀行卡可以加入支付寶，但做唔到快捷支付，因為中信快捷支付係需要用大陸身分證黎申請。）

至於點睇自己有無認證，可以睇幾個位既，最實際其實係上去支付寶網站呢條link https://certify.alipay.com/certifyInfo.htm 一睇就知道。